Alf Gamsletta čoakkáldat
Guolásteaddjiboandakultuvra lei dábálaš eallinvuohki Davvi-Romssas gitta 1950-lohkui. Olbmot ožžo birgejumi luondduresurssain mat iešguđet jahkeáiggi ledje oažžumis. Dábáleamos vuohki lei seaguhus masa gulle guollebivdu, eanandoallu ja meahci riggodagaid čoaggin.
Alf Gamslett lei smávvadálolaš gii elii dálustis oppa eallinagis ovttas guvttiin vieljainis. Su birra lea daddjojuvvon ahte son lei áŋgiris, mearrediđolaš ja systemáhtalaš čoaggi. Son čokkii ja osttii biergasiid ja gálvvuid Ivgus, Moskavuonas, Ittarvuonas, Báhccavuonas ja Romssa suohkanis. Boarraseamos dávvir su čoakkáldagas lea 1700-logu beallemuttos. čoakkáldagas leat guollebivdo- ja eanandoallobiergasat ja -reaiddut, mánáidstohkosat, tekstiillat, girjjit, aviissat, poastakoarttat, dušše máinnašan dihte muhtumiid dain.
Guovlu, gos gait dát gálvvut leat eret, ollá gitta Ivgo-linnjái. Go duiskalaččat čakčat 1944 geassádedje guovllus, de bolde sii oažžu dadjat olles guovllu Ivgo-linnjá nuorttabealde, ja dakko bokte maid materiálalaš kulturárbi doppe jávkkai. Danin Davvi-Romssas lea uhcán gávdnamis viessobiergasat ja -gálvvut mat leat seilon. Gamsletta coakkáldat lea viiddis ja addá gova maid dan materiálalaš kultuvrras mii lei ovddeš áiggiid riddoguovlluin Ivgovuona nuorttabealde.
