Museala doaibma
Miessegietti dállu lea buorre ovdamearka das makkár dábálaš davviromsalaš mearrasámi dállu lei. Dállu lea ásahuvvon 1800-logu beallemuttos. Goahtesajit lagašbirrasis duođaštit goit ahte mearrasámi ásaiduvvan lea ollu boarrasat.
Mearrasámiid heivehaniešvuođa dovdomearkan lea ahte sii máhtte ávkkástallat merrii lassin maid meahci ja bealdduid. Dán erenoamáš iešvuođa dihte ásaiduvvege mearrasámit dávjá šattolaš vákkiide main lei lastavuovdi.
Miessegiettis lea orrunviessu, goahtenávet, stálla ja máŋga smávva olgovisoža ja maid geassenávet. Mearragáttis leat dievva mearrabuvrrit main okta gullá Miessegietti dállui. Fiervábuvrrit leat smávva viesut main seailluhuvvojedje bivdo- ja viessoreaiddut.
Miessegietti dálus beasat oaidnit govt mearrasámi bearaš elii ovdal soađi, ja oahpisteapmái lassin beasat maid borrat árbevirolaš biepmuid. Geassit doppe báidnet šattuiguin láiggiid, mat geavahuvvojit gođđimii. Dálus leat geasseáigge fásta rahpanáiggit (geahča rahpanáiggiid).
Davvi-Romssa Museas lea maid ossodatkantuvra Ája Sámi Guovddážis Olmmáivákkis. Dohko beasat go čuovut galbbaid E6 bálgás Lávkgiettis.
