Ivgobađa márkanbáiki
Ivgobađa Márkanbáiki lea Davvi-Romssa Musea váldorusttet Omasvuona suohkanis.
Sajádat
Ivgobahta -báikegoddi lea čáppa sajis siskkimusas Ivgovuonas. Márkanbáiki lea 2 km davás E6 ja E8 bálggesearus.
Museala doaibma
Ivgobađa márkaniid stuorravuođa áigi deaivvai 1800-lohkui, ja lei dalle stuorimus ja deháleamos gávppašanmárkan Davvi-Romssas. Dološ márkanvisožiin leat dušše guokte seilon otnábeaivái.
Márkanat ja Læstadius
Ivgobađa márkanat ledje boarrasepmosat ja dehálepmosat Davvi-Norggas. Oktan sivvan dasa lei márkaniid vuogas sajádat. Ivgobahta lei lunddolaš deaivvadanbáiki siseatnán ja riddoguovllu olbmuide. Nubbin sivvan sáhtii leat ahte nd. mearrasámi vearu čoaggin lei dáhpáhuvvan dáppe dihto jahkeáiggiid. Vearročoaggima oktavuođas šattai lunddolažžan maid gávppašit. Ivgobađa márkanat leat čálalaš gálduin namuhuvvon juo 1571. Márkanat ledje maid lunddolaš báiki lestadianismma sisafievrredeapmái Davvi-Romsii.
