Museala doaibma
Tørrfoss njáskojuvvui 1750-logus ja das leat orrunviessu, veahkkeviessu, suovvasávdni, návet/láđđu ja golbma buvrri.
Dállu muitala kvenaid sisafárrema birra Davvi-Norgii 1700- ja 1800-loguin. Kvenaid vuogáiduvvamis lea mihtilmas ahte sii ásaiduvve vuotnabađaide ja vákkiid sisa. Nu dáhpáhuvai Návuonas, Ráissas ja Ivgobađas.
Dáin guovlluin leat beahcevuovddit mat ledje guovddážis kvenaid vuogáiduvvamis. Vuovddis sii ožžo dimbbariid ja bihka man sáhtii vuovdit ja ná dinet ruđa.
Ieš dálus lea orrunviessu, veahkkeviessu, suovvasávdni, návet/láđđu ja golbma buvrri: biergobuvri, vuostá- ja bivttasbuvri ja buvri bargoreaidduide. Suovvasávdni lea huksejuvvon suopmelaš vuogi mielde cehkkojuvvon dimbbariin, ja boares dábi mielde vehá dobbeliidda eará viessuin buollinvára geažil. Orrunviessu lea huksejuvvon 1931, muhto árvideamis okta buvrriin lea 1700-logus, dalle go dálus lei vuosttas ásaiduvvan.
Tørrfossas beasat oaidnit govt kvena bearaš lea eallán ja ealihan iežaset. Veahkkeviesus lea láibunuvdna man muvrremii lea geavahuvvon ránesbákti ja láiri. Dát lea áidna dán sullasaš uvdna Davvi-Romssas ja dasa čáhket s. 20 láibbi aktanaga. Geasseáigge uvnnain láibojuvvo láibi dađistaga. Tørrfossas leat geassit fásta rahpanáiggit (geahča rahpanáiggiid).
Davvi-Romssa Musea váldokantuvra lea maid Ráissa suohkanis. Hálddahusviessu Reaššegeažis lea Bjørklygårdenis. Viessu lea huksejuvvon 1920-logus, ja dat lea ovdal leamaš meahcefálddi, báhpa ja elliiddoaktára orrunviessun.
